Konferenca e Donatorëve për Shqipërinë do të zhvillohet ditën e hënë, më 17 shkurt, në Bruksel Kjo Konferencë mblidhet pas tërmetit tragjik të 26 Nëntorit të vitit të kaluar, i cili shkaktoi dëme të shumta në disa zona të Shqipërisë. Gjatë këtij tërmeti humbën jetën 51 persona, ndërsa dëmet llogariten 980 milionë euro. Rindërtimi kërkon rreth 1.08 miliardë euro.
Konferenca e Donatorëve në Bruksel do të organizohet nga Presidentja e Komisionit Europian, Ursula Von der Leyen.
Kryeministri Edi Rama u shpreh dje se ishte optimist që ndihma, e cila do të vinte nga Konferenca e Donatorëve nuk do të ishte simbolike.
Në Konferencë pritet që të marrin pjesë mbi 100 shtete, por edhe Banka Botërore me Fondin Monetar Ndërkombëtar si dhe organizata të tjera. Zëdhënësja e KE-së, Dana Spinant sot dha më shumë detaje nga organizimi i Konferencës së Donatorëve ‘Bashkë për Shqipërinë’.
“Në orën 14:15 Presidentja e Komisionit Europian dhe kryeministri Edi Rama do të nënshkruajnë programin për mbështetjen e Shqipërisë lidhur me rindërtimin me një vlerë prej 15 milionë euro. Presidentja e Komisionit Europian do të hapë konferencën së bashku me kryeministrin Edi Rama dhe presidentin e Këshillit Europian Charles Michel në 14:30.
Komisioneri për Zgjerimin Olivér Várhelyi do të hapë dhe mbyllë sesionin e angazhimeve të donatorëve në këtë konferencë, ndërkohë që komisioneri Janez Lenarčič do të bëjë vlerësimin e nevojave lidhur me dëmet e tërmetit. Në përfundim të konferencës së donatorëve, presidentja Von der Leyen dhe kryeministri Edi Rama do të mbajnë një konferencë për shtyp” tha zëdhënësia.
