Shtetet e Bashkuara të Amerikës kanë paralajmëruar aleatët e tyre, se përdorimi i Huaweit kinez 5G vendos në rrezik Aleancën e Atlantikut të Veriut. Sekretari Amerikan i Shtetit Mike Pompeo ka akuzuar Kinën për spiunazh përmes rrjetit 5G.
Duke folur në Konferencën për Sigurinë në Munih, Pompeo është shprehur se ata që shprehen se NATO ka ‘vdekur’ janë duke e ekzagjeruar ndërsa theksoi se Perëndimi është duke fituar gjithnjë ndaj aktorëve të tjerë si Kina dhe Rusia.
Gjithashtu, edhe Sekretari Amerikan i Mbrojtjes Mark Esper i druhet një spiunazhi të mundshëm nga ana e Kinës përmes rrjetit 5G, i cili mund të jetë një armë e fortë në duart e shërbimeve sekrete kineze për të spiunuar Evropën dhe për të shtënë në dorë informacione të një rëndësie të lartë duke kërcënuar vetë NATO-n.
“Kjo përfundimisht mund të jetë një kërcënim për Aleancën ushtarake më të suksesshme në histori. Shtetet e Bashkuara e kanë goditur Kinën, rivalin e saj të madh në luftën tregtare. Tani rrezikohemi nga spiunazhi”, tha Esper.
Sipas shefit të Pentagonit, “partia Komuniste Kineze po ecën me shpejtësi në drejtimin e gabuar me praktika ekonomike grabitqare dhe po bëhet edhe më agresive në aspektin ushtarak”. /Fjala.al/
