Forcat xheniere kanë bërë të mundur zhvendosjen nga makina e Suad Licit të lëndës plasëse që iu vendos administratorit të Vllaznisë mëngjesin e sotëm. Ata kanë konstatuar se fitili ishte djegur.
I vendosën tritol poshtë makinës, flet Suad Lici: Ndoshta lidhet me…
Ndërkaq, më herët, vetë Lici është shprehur se nuk ka konflikte me askënd, edhe pse ndoshta eksplozivi mund t’i jetë vendosur për shkak të detyrës. Ndërsa ka shpjeguar se ai merret vetëm me mbarëvajtjen e formacionit dhe se ai zbaton direktivat e drejtuesve të klubit.
“Ndoshta lidhet edhe me detyrën time. Le t’ua lëmë organeve kompetente. Nuk jam unë kompetenti. Nuk kam asnjë lloj problematike. Unë jam njeri i lirë dhe do të vazhdoj të jem njeri i lirë. Nuk kam pasur problematika. Unë jam personi përgjegjës për mbarëvajtjen e formacionit. Unë kam qenë i detyruar të zbatoj vendimet e drejtuesve”, ka thënë Lici.
I pyetur nga gazetarët, nëse ky është një lloj presioni që ai të largohet nga administrimi i klubit “Vllaznia”, Lici është shprehur se “do të vazhdoj detyrën. Pa folur organet kompetente nuk kemi pse i vëmë një etiketë. Nëse është një marrëdhënie me sportin, mendoj që strukturat kriminale të qëndrojnë larg sportit. Absolutisht nuk më tremb kjo ngjarje. Në Shkodër më kanë çdo ditë”
Në vendngjarje ka shkuar edhe kryebashkiakja Voltana Ademi e cila ka takuar administratorin dhe është shprehur se gjendja në Shkodër nuk është e qetë.
