Një ngjarje e rëndë është shënuar në qytetin Porto Sant-Elpidio në Itali. Gazeta ‘Il Resto del Carlino’ thotë se një 30-vjeçar është vrarë brutalisht me thikë. Ngjarja është lajmëruar nga një kalimtar në orët e para të mëngjesit. Asgjë nuk mund të bënin mjekët për ta shpëtuar për shkak se plagët ishin të shumta dhe të thella.
Janë banorë të zonës të cilët thonë se personi që është i pajetë në rrugë është shqiptar. Nuk dihet nëse ai është vrarë aty, apo trupi i pajetë është sjellë në atë vend. Ndërkohë mediet kanë publikuar fotot e para nga vendi i ngjarjes të cilat tregojnë se personi që dyshohet që është shqiptar banon në një zonë afër vendit të ngjarjes.
Policia dhe prokuroria italiane kanë marrë në duar faktet e para dhe dëshmitë e personave që e kanë konstatuar trupin e pajetë, ndërkohë që gjithë zona është tronditur nga ky krim. Të dhënat flasin për një zonë të qetë e cila është e populluar nga turistë dhe rrallë ndodhin akte të rënda. Policia po kërkon të dhëna mbi viktimën, jetën e tij dhe personat me të cilët është shoqëruar. Për momentin nuk ka të dhëna mbi identitetin e personit të vrarë po mediat italiane tregojnë se shqiptari kishte shumë goditje thikash në trup dhe në pjesën e qafës. n.k./Fjala.al/
