Policia ka arrestuar shtetasin me iniciale H.H., i cili një ditë më parë teksa drejtonte makinën e Drejtorisë së Përgjithshme të Burgjeve u përplas me një “benz”. Ndërsa për drejtuesin e “benz-it” u referuan materialet në Prokurori. Aksidenti ndodhi paraditen e djeshme në aksin rrugor Krahës–Tepelenë, në vendin e quajtur Qesarat.
Përplasja ka qenë e fortë dhe si pasojë mjeti i burgjeve përfundoi në një byrektore në anë të rrugës. Për pasojë një efektiv i angazhuar për shoqërimin e të burgosurve mbeti i plagosur lehtë. Julian Verboshi u dërgua në spitalin rajonal të Gjirokastrës ku burimet thanë se nuk ka asnjë rrezik për jetën. Ndërkohë të burgosurit, emrat e të cilëve nuk u bënë të ditur, u transportuan me mjete të tjera të drejtorisë së burgjeve.
Fati i ka shpëtuar punonjësit e byrektores pa u shtypur nga mjeti i burgjeve pasi ka hyrë deri afër me vendin ku punonin gratë. Sipas të dhënave të policisë ka qenë një manovër e gabuar konkretisht e drejtuesit të burgjeve që ka bërë të mundur përplasjen e pastaj devijimin për në dyqanin e byrekëve. Për fatin e mirë të gjithë kanë shpëtuar pa pasoja të rënda për jetën dhe shëndetin! n.k/Fjala.al/
