Tensionet midis mazhorancës dhe presidentit Ilir Meta jo vetëm kanë arritur kulmin por vijojnë të ashpërsohen gjithnjë e më shumë.
Pas kundërpërgjigjeve ndaj ministrit të Brendshëm Sandër Lleshaj, kreu i shtetit ka marrë në shënjestër edhe kreun e Komisionit të Ligjeve Ulsi Manjën.
Duke iu referuar akuzave të opozitës ndaj Ulsi Manjës si i përfshirë në dosjen 184 për vjedhjen e zgjedhjeve në Dibër, Meta thekson përmes zëdhënësit të tij se faktet e reja tronditëse do ta bëjë atë të harrojë dosjen e Dibrës. 
“Ftohet zëdhënësi i Dosjes së Dibrës të marrë pjesë nesër në konferencën e radhës për shtyp në Presidencë, e madje të bëjë pyetje dhe debat para gazetarëve, jo vetëm si kryetar i Komisionit të Ligjeve dhe lider i reformës në drejtësi, por dhe si filozof i paparë që u shfaq sot.
Me qetësi dhe drejtësi!
Deri në 2 mars jemi të bindur se do bashkohesh me mbarë popullin kundër grushtit të shtetit. Se faktet e reja tronditëse do bëjnë të harrohet dhe Dosja 184. Presidenti të pret nesër në Presidencë, t’i dëgjojë këshillat e tua nga afër. Ai do të trajtojë me më shumë përulësi, se sa e trajtove ti në Komisionin Parlamentar. Të presim!”, shkruan zëdhënësi i Ilir Metës Tedi Blushi.
Ndërkaq, ditën e sotme Meta mbajti një konferencë të jashtëzakonshme për shtyp ku bëri të ditur se do të bashkohet me shqiptarët datë 2 mars në bulevardin Dëshmorët e Kombit, ku edhe do nënshkruajë një dekret për shpërndarjen e Parlamentit.
