Një anije shqiptare e koduar me emrin “ANA” është bombarduar me kundërtank në portin e Tripolit në Libi.
Anija po transportonte armatime nga Turqia drejt Libisë, por pas ankorimit në port dy ditë më parë është sulmuar me kundërtank nga forcat e gjeneralit Khalifa Haftar.
Menjëherë është akuzuar Ankaraja për thyerje të embargos, por ajo ka mohuar që anija të jetë turke.
Ishin hetimet e nisura për zbardhjen e ngjarjes që krijon një incident diplomatik ndërkombëtar të cilat zbardhën faktin se anija e përdorur për trafikun e armëve mes Turqisë dhe Libisë është shqiptare.
Edhe autoritetet shqiptare janë përfshirë në hetimet mbi rastin dhe rolin e pronarit të anijes në këtë thyerje të embargos së armëve me Libinë.
Mësohet se anija me emrin “ANA”, ishte ankoruar fillimisht në portin e Mersinit në Turqi, ku ekuipazhi shqiptar ia dorëzoi disa shtetasve turq. Top Channel bën të ditur se ka kontaktuar me anëtarët e ekuipazhit të anijes, ndërsa ata kanë konfirmuar se ata janë larguar nga anija në Turqi dhe pas kësaj mjeti lundrues është pajisur me një ekuipazh turk që ka marrë përsipër lundrimin e radhës.
Pasi u ngarkua me armatime, anijes iu fshinë simbolet shqiptare për ta bërë të vështirë identifikimin e saj.
Sipas zëdhënësit të forcave qeveritare Mustafa al-Mujie, në portin e Tripolit ka pasur një sulm nga forcat e Haftar që ka shkaktuar panik dhe ka bllokuar punën e anijeve komerciale, por mohoi prezencën e anijes turke të ngarkuar me armë.
Ai tha se porti përdoret vetëm për qëllime civile dhe nuk ka asnjë bazë ushtarake apo armatime.
Turqia ka dërguar në Libi trupa dhe mjete ushtarake për të mbështetur qeverinë e Tripolit të drejtuar nga Fayez al-Sarraj, si dhe është akuzuar për dërgimin e mercenarëve sirianë, përfshi edhe luftëtarë të ISIS.
