Një natë më parë u bë me dije se dy strukturat elitë të policisë së shtetit kanë mbërritur në Elbasan dhe kanë nisur kontrollet. Po kaq, nuk u fol më gjatë. Mëngjesin e sotëm mohet edhe arsyeja e vizitës së bluve në qytetin e atentateve të bujshme dhe mësohet se ka të bëje me lojërat e fatit.
Paska ende lokale që ushtrojnë aktivitetin e paligjshëm dhe policia është vendosur aty prej orësh për të bërë goditjet e këtij aktiviteti.
Sipas të dhënave paraprake dhjetëra persona janë shoqëruar në Policinë e Elbasanit, gjatë natës së fundit, në një aksion të befasishëm të uniformave blu. Burime jo zyrtare raportuan se personat e shoqëruar janë kryesisht administratorë të lokaleve të ndryshme, që kanë pasur lloto gjatë viteve të fundit.
Gjatë kontrolleve të zhvilluara në qytetin e Elbasanit dhe jo vetëm, efektivët e policisë kanë sekuestruar edhe pamje filmike të kamerave të sigurisë të lokaleve, ku dyshohet se kohë pas kohe në mënyrë të fshehtë organizohen lojëra të palejuara të fatit. Gjatë kontrolleve, policia ka sekuestruar edhe aparatet e celularëve të disa personave për të parë nëse kanë luajtur lojëra fati përmes telefonit.
Ndërkohë, kontrollet e policisë vazhdojnë të jenë intensive në të gjitha akset rrugore, ku kontrollohen pothuajse të gjitha automjetet. Nuk ka konfirmime zyrtare, nëse ka të arrestuar gjatë këtij operacioni apo jo por bëhet me dije se këto kontrolle do vijojnë në të gjithë vendin. n.k/Fjala.al/
