Trageti i cili solli mbetje të rrezikshme nga Italia në Shqipëri është penalizuar disa herë, por ia ka hedhur paq, pa asnjë ndëshkim derisa u kap dje në portin e Vlorës me ngarkesën me mbetje toksike.
Kjo ka ndodhur nën hundën e autoriteteve shqiptare. Këtë fakt e pranon vetë Drejtoria e Përgjithshme Detare e cila ka bllokuar anijen.
Drejtori i Drejtorisë së Përgjithshme Detare, Paulin Ndreu, deklaroi se është ngritur një grup pune për të bërë një analizë të gjithë situatës. Sipas Ndreut, nga inspektimi i kryer rezulton se mallrat e anijes “S.T. Damian”, në bord nuk ishin deklaruar në dokumentin e deklarimit të mbetjeve që çdo anije dorëzon në portin ku mbërrin, ndërsa janë marrë edhe deklarimet e kapitenit dhe oficerëve të anijes.
Drejtori i Drejtorisë së Përgjithshme Detare thekson gjithashtu se anija në fjalë ka shkelur disa prej Konventave Ndërkombëtare.
Sipas tij, kjo kompani ka qenë në vëzhgim nga ana e Drejtorisë së Përgjithshme Detare pasi është konstatuar edhe herë të tjera për vepra të kundra-ligjshme detare, madje ka pasur dhe penalzime ndaj saj, sa i takon mënyrës së operimit dhe thyerjes së rregullave dhe urdhrave në ujërat territorial të Republikës së Shqipërisë.
“Kjo anije dhe kjo kompani ka qenë problematike edhe më parë. Ne kemi marrë gjithmonë masa dhe e kemi mbajtur në vëzhgim dhe monitorim për shkeljet që ka kryer, por ky rast është shumë i rëndë, pasi transporti i këtyre mbetjeve krijon një precedent shumë të rrezikshëm për shëndetin edhe të pasagjerëve që udhëtojnë me këtë anije, por edhe të vendeve ku ato groposen. Pas vlerësimit të situatës dhe inspektimit të detajuar nga kontrolli shtetëror portual ne ditën e nesërme do të bëjmë dhe njoftimin e shtetit të flamurit, pasi kjo është një anije me flamur të huaj (Panama) dhe si anije me flamur të huaj ajo ka disa të drejta dhe disa detyrime në shtetet në të cilat operon”, shpjegoi drejtori Ndreu.
Një ditë më parë në Portin e Vlorës u ndalua një anije e linjës Brindisi-Vlorë. Ajo transportonte një sasi lëndësh të rrezikshme, e cila bë shkak edhe për arrestimin e 6 personave, midis tyre drejtuesit të anijes dhe zëvendësit të tij.
