Pas deklaratës që Presidenti Meta i bëri Ministres së Drejtësisë, Etilda Gjonajt, për paralajmërimin se do ta kallëzonte penalisht në SPAK, ka ardhur edhe reagimi i ministres.
Nëpërmjet një postimi në rrjetet sociale, Gjonaj shprehet se është e gatshme për t’u përgjigjur para Prokurorisë së Posaçme kundër Krimit të Organizuar dhe Korrupsionit.
Ndërkohë, sa i përket faktit që Meta tha se e ka humbur besimin e tij si ministre dhe duhet të japë dorëheqjen, Gjonaj thekson se “Presidenti ka në dorë vetëm dorëheqjen e tij”.
Kujtojmë se Presidenti Meta paralajmëroi të kallëzojë në SPAK ministren Gjonaj, pasi tha se është ajo që ka kërkuar botimin në Fletoren Zyrtare të vendimit të Këshillit të Emërimeve në Drejtësisë për pikëzimin e kandidatëve për në Gjykatën Kushtetuese ku Arta Vorpsi radhitej e para.
Reagimi i plotë i Gjonat:
E përshëndes Presidentin që pas disa shfaqjesh publike pa ekuilibër etik, ka zgjedhur t’i drejtohet SPAK me një kallëzim penal për mua; një marrëzi e radhës po të paktën në rrugë institucionale, madje drejt një institucioni të dalë nga Reforma që ai lufton pa fre!
Jam e gatshme t’i përgjigjem ligjërisht, me të gjithë përgjegjësinë po edhe me krenarinë që i përkas Frontit të Reformës në Drejtësi, denigruesit botërisht të njohur të kësaj reforme jetike! Sa për dorëheqjen zotëria ka në dorë vetëm të tijën dhe të askujt tjetër./Fjala.al
