Kukësit i ka rrëshqitur nga duart fitorja në “Air Albania”. Verilindorët ishin të parët që kaluan në avantazh në minutën 53.
Atëherë kur u duk se Kukësi po shkonte drejt fitores, Tirana shënon golin e barazimit me anë të Bathas. Ky i fundit ekzekutoi në mënyrë perfekte një goditje dënimi që u ndal vetëm nga rrjeta e Dashamir Xhikës në minutën e 84.
Kaq mjaftoi dhe Tirana po kërkonte golin e fitores. Dy minuta pas golit të barazimit është Cobbinha që driblon 4 lojtarë në zonën e Kukësit dhe pason për Agustin Torassën, i cili nuk e ka aspak të vështirë ta dërgojë topin në rrjetë dhe të bëjë që bardheblutë të shpërthejnë në festë.
Përveç fitores domethënëse, Tirana arriti një sukses edhe sa i përket tabelës së klasifikimit në këtë përballje direkte.
Bardheblutë i rrëmbyen verilindorëve kreun e tabelës duke u ngjitur në kuotën e 44 pikëve, 2 pikë më shumë se Kukësi që sot u largua kokulur nga stadiumi.
Pas ndeshjes, trajneri i Kukësit, Shpëtim Duro, ishte natyrshëm i ngrysur në fytyrë, teksa ngushëlloi veten me fjalët klishe se ‘ky është futbolli, edhe pse Tirana ishte një skuadër e dëshpëruar në fushë”
“Ky është futbolli! Duhet ta mbyllnim ndeshjen, madje pashë te Tirana në disa momente aksione dëshpëruese dhe të parrezikshme. Pastaj erdhi kartoni i kuq, ai gol në goditje dënimi dhe gjithçka u kthye. Nuk ishte rezultati i drejtë i këtij takimi, për të qenë realist. Nuk kam se çfarë t’i them djemve. Vetëm 10 minutat e para nuk luajtëm mirë, deri sa hymë në shinat e lojës tonë. E humbëm ndeshjen në 5 minuta, por futbolli i pranon këto, edhe pse është verdikt i vështirë të pranohet”, tha Duro për Supersport.
