Presidenti Ilir Meta thekson se kryeministri po përpiqet në mënyrë mafioze të rrëmbejë Gjykatën Kushtetuese.
Me anë të një statusi në Facebook, si dhe duke iu përgjigjur pedagogut të gazetarisë, Mark Markut, kreu i shtetit saktëson se problemi i Ramës nuk është kufizimi i kompetencave të Presidentit por i Gjykatës Kushtetuese.
Sipas Metës, Rama po tenton të rrëmbejë Gjykatën Kushtetuese në mënyrë që të vrasë çdo mundësi për llogaridhënie apo ndryshime demokratike.
Presidenti ka bërë sërish thirrje për tubimin e 2 marsit, që sipas tij, qytetarët duhet të mblidhen jo për të, por për Shqipërinë.
Statusi i Ilir Metës:
I dashur Profesor Mark Marku!
Rama nuk po përpiqet t’i kufizojë kompetencat Presidentit. Ky s’është problemi i vërtetë. Rama po përpiqet në mënyrë anti-kushtetuese e mafioze të rrëmbejë Gjykatën Kushtetuese të Shqipërisë (pra vetë Kushtetutën) në mënyrë që të vrasë çdo mundësi për llogaridhënie dhe çdo mundësi për ndryshime demokratike! Ndaj në 2 mars në Bulevardin “Dëshmorët e Kombit” jo për Presidentin, por për Shqipërinë! #PërKushtetutën #PërShqipërinë
