Frika dhe alarmi i krijuar nga koronavirusi anuluan katër ndeshje të Serisë A javën e kaluar dhe tashmë në dyshim është edhe zhvillimi i takimeve të kësaj jave.
Në një intervistë për “Rai Uno” Kryeministri i Italisë, Giuseppe Conte dha lajmin e kësaj mase dhe më tej shtoi se nuk beson se e gjitha kjo mund të mbyllet në një javë dhe me shumë mundësi mund të zgjasë.
Përhapja e këtij virusi me ritme shumë të shpejt në veri të Italisë bëri që disa rajone të kyçen plotësisht, duke mbyllur çdo hapësirë publike dhe shkollat deri më 1 mars.
“Nuk mendoj se do të jemi në gjendje ta ngadalësojmë virusin ngjitës brenda javës në atë masë sa për ta lejuar rinisjen e eventeve sportive”,-u shpreh Conte.
“Jemi duke e vëzhguar situatën vazhdimisht. Do ta shohim evoluimin e virusit ngjitës dhe do ta vlerësojmë shtyrjen e të gjitha ndeshjeve”-tha ndër të tjera Kryeministri i Italisë.
Kjo intervistë e kreut të qeverisë së Italisë të bën të kuptosh se deri më 1 mars mund të anulohen të gjitha ndeshjet e kësaj jave./Fjala.al/
