Është rritur në pesë numri i viktimave nga coronavirusi në Itali. Mediat italiane raportojnë se viktima është një i moshuar 88 vjeçar, i cili ka ndërruar jetë në Caselle Landi, të Lodigianos, në veri të vendit.
Edhe katër viktimat e mëparshme ishin të moshuar dhe kishin patur komplikacione të tjera shëndetësore. Është konfirmuar tashmë që më të rrezikuarit nga coronavirusi janë moshat e treta dhe që kanë probleme të tjera shëndetësore, për shkak të sistemit të dobët imunitar.
Janë të paktën 219 persona në Itali që rezultojnë të infektuar me coronavirus.
Qarkullimi në rrugët e shtetit fqinj është shumë i pakët për arsye se universitetet në Piemonte, Friuli Venezia Giulia dhe Genova janë mbyllur për një javë, ashtu siç janë mbyllur edhe shumë shkolla në këto rajone.
Biznese të shumta kanë mbyllur aktivitetet nga frika e përhapjes së mëtejshme të virusit vdekjeprurës.
Në Milano turistët nuk mund të vizitojnë pikën kryesore të qytetit, il Duomo, pasi sheshi do të qëndrojë i mbyllur. Ndërkohë në Venecia janë anuluar karnavalet për të paktën 7 ditë, si dhe janë mbyllur shumë zona për vizitorët.
Kryeministri italian, Giuseppe Conte kërkon nga qytetarët që të mos jetojnë me panik pasi masat e ashpra po ndërmerren pikërisht për të rritur sigurinë. Gjithsesi, këto masa rrjedhimit kanë krijuar te italianët një gjendje ankthi.
