Një sasi prej 385 kg produkte ushqimore të cilësuara si ndihma humanitare, të cilat vinin nga Mal i Zi, janë ndaluar nga Drejtoria e Rajonale e AKU-së, në pikën e kalimit kufitar të Hanit të Hotit. Destinacioni i këtyre ndihmave mësohet se ishte qyteti i Durrësit dhe se këto pako me ndihma ishin të destinuara familjet që kanë pasuar dëmi nga tërmeti!
Ndalimi i ndihmave u bë pasi në momentin e hyrjes në vendin tonë këtyre produkteve iu kishte mbetur afat përdorimi, më pak se gjysma e jetëgjatësisë së deklaruar në etiketë. Në një njoftim zyrtar u bë me dije se: Pas kontrollit fizik të bërë nga trupa inspektuese, këto produkte ushqimore: çaj “SOLA” me afat përdorimi datë 04.03.2020, lëng frutash me afat përdorimi datë 29.02.2020, konfleksa “Bebivita” me afat përdorimi datë 26.02.2020.
Këto produkte rezultuan në kundërshtim me Urdhrin e Ministrit Nr 250 datë 29.07.2011 Pika 1 dhe 2 “Mbi disa masa për hyrjen në territorin e Republikës së Shqipërisë të produkteve ushqimore” pasi në momentin e hyrjes në territorin e Shqipërisë produktit i kishte mbetur me pak se gjysma e jetëgjatësisë së tij (Afatit të përdorimit) të deklaruar në etiketë.
Për rrjedhojë këto produkte ushqimore do të kthehen në vendin e origjinës, në Mal të Zi, me dakordësi edhe të subjektit importues. Po ashtu mësohet se edhe mallrat e tjera kishin datë skadencë të afërt ku me sa duke pritja e grumbullimit të sa më shumë ndihmave ka bërë që ushqimet t`i afrohen datës së skadencës!
