Në samitin e Bankës Evropiane për Rindërtim dhe Zhvillim, Albin Kurti ka bërë me dije se qeveria e tij do të punojë për ndërtimin e autostradës që lidh Prizrenin me Tetovën. Kryeministri i Kosovës e konsideroi të domosdoshme lidhjen me qytetin shqiptar në Republikën e Maqedonisë së Veriut.
Deklarata e Kurtit është përshëndetur dhe është pritur me entuziasëm nga shqiptarët në Tetovë. Qyteti ka mbetur i izoluar dhe nuk ka asnjë lidhje të shpejtë me autostradë me Kosovën apo Shqipërinë.
Në të kaluarën ka patur projekte që synin të lidhin dy qytetet shqiptare. Aktualisht duhen të paktën 3 orë për të mbërritur nga Tetova në Prizren, ndërsa lidhja me autostradë do e shkurtonte distancën në 40 minuta rrugë.
Sipas shifrave jo-zyrtare në Tetovë raportohet se jetojnë rreth 180 mijë njerëz, ku mbi 70% e tyre i përkasin kombësisë shqiptare.
