Një ngjarje e rëndë ka tronditur Durrësin pak minuta më parë ku një grua është vrarë me levë nga bashkëshorti i saj në mes të qytetit.
Gruaja është goditur me levë brenda biznesit të metrazheve që kishte bashkë me burrin e saj.
Ngjarja ka ndodhur në sheshin ‘Azem Hajdari’ të qytetit bregdetar, ndërsa para krimit, mësohet se çifti janë konfliktuar me njëri-tjetri.
Më pas, 63-vjeçari ka goditur me levë hekuri gruan e tij 59 vjeçe, e cila ka ndërruar jetë si pasojë e plagëve të marra.
Deri më tani nuk dihet arsyet e këtij krimi të rëndë. Ndërkaq, policia thekson se në vendngjarje ndodhet grupi hetimor, ku vijon punën për sqarimin dhe dokumentimin e ngjarjes.
Njoftimi i policisë: Më datë 26.02.2020, rreth orës 11:35, në lagjen Nr. 12, Durrës, shtetasi R. T., 63 vjeç, banues në lagjen Nr. 7, Durrës, në dyqanin që tregton metrazhe, dyshohet se ka goditur me levë hekuri, bashkëshorten e tij, shtetasen H. T., 59 vjeçe, e cila ka ndërruar jetë si pasojë e plagëve të marra. Shërbimet e Policisë kanë arrestuar në flagrancë autorin e dyshuar të ngjarjes. Në vendngjarje ndodhet grupi hetimor, ku vijon punën për sqarimin dhe dokumentimin e ngjarjes.
Kjo është ngjarja e dytë kriminale ku vritet një grua pas asaj të mbrëmjes së djeshme në Mirditë ku një grua u vra bashkë me të vëllanë nga ish-burri i saj, i cili ndodhet në kërkim nga policia./Fjala.al/
