Gazetari Denis Dyrnjaja është i mendimit se Partia Socialiste sot është e ngjashme me Partinë Demokratike të 2013-ës kur humbi zgjedhjet parlamentare. Në emisionin “Arena” në Ora Neës, Dyrnjaja tha se në PS nuk ekziston numri 2 apo 3 dhe kjo është krijuar për shkak se partia është kthyer në një garnizon të rreshtuar.
Sipas gazetarit, largimi i Ramës do të dërrmonte PS-në njësoj siç ndodhi me PD-në me largimin e Sali Berishës.
“Në fakt pikëpyetja e madhe kjo është. Ajo që la pas Berisha me PD, është e frikshme që mund të jetë dhe me ikjen e Ramës. Në mënyrën se si funksionon sot PS, largimi i Ramës do ta dërrmonte PS. Sot nuk ka një dysh, një tresh, unë sot shoh një garnizon të rreshtuar. Idea është që PS ka humbur elasticitetin politik brenda vetes së vetë. Atë lloj lirie që krijoi Nano.
Kishte shumë gjëra që prisheshin për të krijuar atë frymë liberale. PS ka qenë një buqetë kualitetesh dhe nga pikëpamja intelektuale. Në kualitetin e debatit politik, nëse dikur kishim më pak shantazh, sot kemi vetëm shantazh. Sot flitet me kodifikime. Kemi kaluar në një rrafsh tjetër. Nuk ka më politikë sot”, tha Dyrnjaja.
