Regjisori iranian Mohammad Rasoulof , i cili fitoi javën e kaluar “Ariun e Artë” në Berlin , për filmin “There is no evil”, është dënuar nga qeveria e vendit të tij për të vuajtur një dënim prej një viti burg . Lajmi u konfirmua nga avokati i tij Nasser Zarafshan për agjencinë Associated Press.
Që nga viti 2010 Rasoulof është përndjekur nga vendi i tij për filmat që ai krijon duke treguar sa e ashpër dhe tirane është qeveria iraniane. Ai u arrestua në mes të një xhirimi dhe akuzohet për xhirime pa leje, për bërje propagande kundër regjimit dhe u dënua me 6 vjet burg dhe tërheqje të pasaportës, përfshirë dhe ndalimin e largimit nga vendi.
Rasoulof, i cili jeton me kusht , nuk ishte në gjendje të shkonte në festivalin e filmit në Berlin për të marrë çmimin e tij. Në vend të tij ai dërgoi vajzën e tij, e cila gjithashtu interpreton në filmin fitues.
Regjisori, i cili ka studiuar sociologji në Teheran, është një nga kineastët më të njohur në vend dhe pse asnjë nga filmat e tij nuk është shfaqur në Iran./Fjala.al
