Prindërit e nxënësve të helmuar kanë tentuar të hyjnë brenda shkollës ‘Janaq Kilica’ në Fier, për të shoqëruar fëmijët e tyre, pasi i tremben një tjetër helmimi.
Por ata janë penguar nga policia, e cila nuk i ka lejuar të futen brenda ambienteve të shkollës, ndërsa thuhet se mësimi ka nisur normalisht.
Më herët, policia së bashku me prokuorinë njoftuan se çdo bëhet me 2 nxënësit problematikë që helmuan shokët e tyre në këtë shkollë duke iu hedhur sprajt me lëndë gazi.
Sipas specialistëve për Hetimin e Krimeve në Komisariatin e Policisë Fier, nën drejtimin e Prokurorisë Fier, si pasojë e përdorimit të një sprajti me lëndë gazi, në ambientet e brendshme të shkollës, disa nxënës shfaqën shqetësime me frymëmarrjen dhe pasi morën ndihmën e parë në Spitalin Rajonal Fier, u larguan për në banesë.
Në përfundim të veprimeve hetimore rezultoi se sprajti ishte përdorur nga 2 nxënës të kësaj shkolle, konkretisht A. M., 15 vjeç dhe A. H., 15 vjeç, të cilët u proceduan penalisht.
Materialet i kaluan Prokurorisë pranë Gjykatës së Shkallës së Parë Fier, për veprat penale “Ndotja e ajrit” dhe “Prishja e qetësisë publike”./Fjala.al/
