Një shqiptar është qëlluar me armë zjarri në zonën Paleo Faliro të Greqisë. Pasi kanë qëlluar mbi shqiptarin autorët janë larguar me shpejtësi ndërsa i plagosuri është dërguar në spital ku ndodhet jashtë rrezikut për jetën.
Sipas policisë, shqiptari ishte përfshirë në një përleshje me katër persona të tjerë. Përleshja ka nisur në një dyqan dhe vazhdoi më pas në rrugë.
Gjatë përleshjes njëri nga personat ka nxjerrë armën dhe ka qëlluar në drejtim të shqiptarit duke e lënë të plagosur atë.
Autorët më pas i hipën një makine dhe u zhdukën me shpejtësi.
Sipas mediave greke ende nuk dihen shkaqet e plagosjes së shqiptarit, por dyshimet e para çojnë tek larja e hesapeve apo përplasja për pazaret e drogës.
Mediat greke shkruajnë se ngjarja ndodhi në një zonë shumë të populluar. Ndërkaq, policia ka mbërritur në vendngjarje për të zbardhur rrethanat e këtij atentati. Ndërsa grupe të tjera policore u janë vënë nga pas për të ndaluar dhe kapur atentatorët.
