31 vjeçari i cili ndodhet në Spitalin Infektiv të Tiranës si infektuar me koronavirus ka lëshuar sot kritika të forta ndaj stafit mjekësor. Në një komunikim telefonik me Ora Neës, i riu ka bërë me dije se mjekët nuk e kanë informuar nëse ka apo jo koronavirus, edhe pse mbahet prej 36 orësh i izoluar.
Ai thotë se familjarët e tij kanë kontaktuar me urgjencën, por aty u thonë se emri i tij nuk ekziston dhe i sorrollasin në institucione të tjera. Sipas pacientit, edhe infermierët që e vizitojnë nuk kanë dijeni nëse është i infektuar me koronavirus.
“Kanë bërë deklaratë se unë jam i prekur me koronavirus, por ndërkohë mua këtu nuk asnjë s’më ka komunikuar se kam koronavirus. Kam mbi 36 orë që jam i izoluar. Ka ardhur vetëm një doktor dje që ka marrë analizat dhe pastaj kanë ardhur vetëm infermierë. Edhe infermierët nuk e pranojnë që jam me koronavirus dhe çuditen se si edhe ata nuk kanë asnjë sinjalizim. Jam në merak për familjarët e mi me të cilët kam patur shumë kontakte. Marrin në telefonë urgjencën por ata i thonë se emri im nuk ekziston.
Nuk ka ardhur një doktor me analizat e mia dhe të më thotë që do të ndjekim këtë apo atë kurë. Nuk kam asnjë lloj konfirmimi”, shprehet 31 vjeçari.
I riu deklaron se familjarët e tij nuk janë marrë nga mjekët për t’ju nënshtruar analizave nëse janë të prekur nga koronavirusi.
Ministria e Shëndetësisë deklaroi mbrëmjen e djeshme se 31 vjeçari ishte një prej katër personave të tjerë të konfirmuar me koronavirus. Numri i përgjithshëm ka arritur në 6.
