Kriza e koronavirusit po thellohet në Evropë, vetëm pak pasi kancelarja gjermane paralajmëroi se mund të infektohet deri në 70% e popullsisë.
Në Britani, ministrja e shëndetësisë u diagnostikua me koronavirus ndërsa numri i të infektuarve i kaloi 450 persona, rritja më e madhe kjo brenda një dite.
Siç njofton nga Londra, korrespondenti i Zërit të Amerikës Henry Ridgwell, Italia vazhdon të jetë vendi më i goditur në Evropë, ndërsa vendet fqinje i frikësohen një impakti të ngjashëm gjatë ditëve në vijim.
Epidemia në Itali filloi më pak se tre javë më parë. Tashmë ka infektuar dhjetëra mijëra njerëz, ka shkaktuar disa qindra viktima dhe ka detyruar një vend të tërë të izolohet. Në Lombardi, në Italinë veriore, spitalet janë të mbingarkuara. I gjithë vendi po mundohet të përllogarisë humbjet.
“Ky është terror psikologjik”, thotë Giulia, pronare dyqani. Impakti ekonomik ndaj Italisë pritet të jetë brutal, me sistemet e transportit dhe bizneset e mbyllura, turistë që nuk udhëtojnë më dhe konsumatorët që qëndrojnë në shtëpi.
Ekspertët e shëndetësisë thonë se vendet e tjera do të pasojnë pas disa javësh Italinë, me epideminë që pritet të arrijë kulmin së shpejti.
Liderët politikë po përpiqen të përballen me sfidën dhe të udhëheqin nëpërmjet shembullit të tyre. Udhëheqësit e BE-së e zhvilluan takimin e tyre të martën nëpërmjet videokonferencës. Ndërkaq, ministrja britanike e shëndetësisë është diagnostikuar me coronavirus. Ajo u takua javën e kaluar me qindra ligjvënës në parlament dhe mori pjesë në një pritje të kryeministrit Boris Johnson.
Deri më tani, Britania ka qenë më e kujdesshme në vendosjen e kufizimeve ndaj lëvizjes. “Vendosja e shtetrrethimit nuk është domosdoshmërisht gjëja e duhur. Është absolutisht i rëndësishëm momenti kur merret vendimi. Nëse vendoset para kohe, njerëzit nuk do ta zbatojnë për një periudhë të zgjatur”, thotë dr. Jenny Harries, nëndrejtore e Shërbimit Mjekësor Britanik.
Banka e Anglisë bëri një ndërhyrje emergjence duke ulur me 0.5% normën e interesit, vetëm disa orë përpara se të paraqitej buxheti vjetor i qeverisë, i dominuar këtë vit nga masat ndaj coronavirusit.
Buxheti parashikon 39 miliardë dollarë për të ndihmuar njerëzit dhe bizneset. “Sado të kushtojë, do të mbështesim Shërbimin Kombëtar të Shëndetit. Gjithashtu, nëse njerëzit gjatë kësaj krize sëmuren ose nuk janë në gjendje të punojnë, duhet t’i mbështesim financiarisht. Duhet të sigurohemi që sistemi ofron mjaftueshëm garanci për t’iu rikthyer jetës normale”, tha Rishi Sinak, Sekretari i Thesarit të Britanisë.
Në Spanjë, Greqi dhe Republikën Çeke, universitetet dhe shkollat janë mbyllur për të paktën dy javë. Udhëheqësja e Gjermanisë bëri të mërkurën një paralajmërim të fortë. “Duhet të kuptoni se nëse virusi është këtu dhe popullsia nuk ka imunitet ndaj tij, ndërsa nuk kemi ende një vaksinë apo terapi, një përqindje e lartë e ekspertëve thonë se 60 – 70% e popullsisë do të infektohet për sa kohë vazhdon kjo situatë”, tha Kancelarja gjermane Angela Merkel.
Një virus që filloi në një qoshe të Kinës është përhapur tashmë në mbarë botën dhe po transformon mënyrën e jetesës së qindra miliona njerëzve. /VOA/
