Një ngjarje e rëndë ka ndodhur pasditen e sotme në Prishtinë teksa një person është plagosur me armë zjarr.
Zëdhënësja e Policisë së Kosovës për rajonin e Prishtinës, Flora Ahmeti, ka deklaruar se personi i plagosur, i gjinisë mashkullore është dërguar për trajtim mjekësor.
“Rreth orës 15:00 kemi marrë informatën se në lagjen Arbëria në Prishtinë, ka pas të shtëna me armë zjarri. Njësitet policore kanë dalë në vendin e ngjarjes dhe kanë nisur një hetim lidhur me rrethanat e këtij rasti”, ka thënë Ahmeti.
Për rastin në fjalë, sipas Ahmetit kanë filluar hetimet në identifikimin dhe arrestimin e personave të përfshirë, transmeton Telegrafi.
Në video, shihet edhe arma, për të cilën policia nuk ka dhënë detaje nëse është arma me të cilën është plagosur personi apo i plagosuri ka tentuar të kundërpërgjigjet.
