I gjithë shtypi i shkruar ka ndërprerë ditën e sotme botimin si një masë për të mbrojtur lexuesit dhe të gjithë personat që merren me shpërndarjen e shitjen e tyre.
Gazetat në të gjithë vendin ranë dakord që të shkonin një vendim të tillë, pasi situata e krijuar nga koronavirusi në vend nuk duket aspak e mirë.
Për shkak të situatës së pazakontë në përhapjen e coronavirusit “Covid-19” dhe duke pasur si prioritet shëndetin e qytetarëve, gazeta Fjala ka vendosur të ndërpresë përkohësisht botimin. Në mbrojtje të lexuesve, bordi drejtues i gazetës Fjala gjykoi se ndërprerja e përkohshme është e nevojshme duke mos e imponuar lexuesin që të dalë nga banesat për të blerë gazetën.
Megjithatë, lexuesi ynë do të njihet me zhvillimet e fundit dhe me shkrime të thelluara nëpërmjet faqes se web www.fjala.al. Bashkarisht besojmë se do ia dalim dhe shumë shpejt gazeta Fjala do rikthehet sërish pranë lexuesit në formatin print.
Konfirmimi i rasteve të para me koronavirus para disa ditësh në vendin tonë dhe rritja e tyre në 33 persona të rezultuar pozitiv ditën e sotme, nga ku 1 person humbi dhe jetën ka bërë që media ta marrë shumë seriozisht rastin në fjalë dhe të japë kontributin e saj për këtë emergjencë.
Për të parandaluar sadopak shpërndarjen e këtij virusi të rrezikshëm, ky vendim u pa si një nevojë e domosdoshme./Fjala.al/
PARANDALO, MOS RREZIKO VETEN DHE TË AFËRMIT NGA KORONAVIRUSI
