Duke nisur nga dita e sotme Shqipëria do të izolohet e gjitha duke mbyllur kufijtë e saj tokësor si pasojë e situatës emergjente të krijuar nga koronavirusi.
Në njoftimin e tij, kryeministri Rama tha se kufiri tokësor i Shqipërisë do të jetë i hapur vetëm për transport mallrash.
“Nga nesër, e diel 15 mars në mesnatë, ora 00.00, të gjitha hyrjet tokësore në Shqipëri nga Mali i Zi, Kosova, Maqedonia e Veriut dhe Greqia, do të mbyllen për të gjithë udhëtarët me autobus, mikrobus apo veturë! Kufiri tokësor i Shqipërisë do të qëndrojë kudo i hapur vetëm për transportin e mallrave. Frikë aspak, kujdes po!”, shkroi dje Rama.
Prej dy ditësh, kryeqyteti, por edhe disa qytete ndodhen në karantinë pas urdhrit të qeverisë për të parandaluar përhapjen e mëtejshme të koronavirusit, ku deri më tani numrit i të prekurve ka arritur në 38 ndërsa ka ndërruar jetë vetëm një 73-vjeçare para pak ditësh në spitalin e Durrësit. Për shkak të kësaj situate, Shqipëria pezulloi fluturimet, lundrimet me traget, dhe tashmë edhe kufijtë tokësorë.
