Situata e shtetrrethimit është e vështirë për të gjithë, por ca më tepër për ata që janë larg familjeve të tyre.
Pas mbylljes së kufijve 20 shtetas shqiptarë kanë ardhur në këmbë nga Hani i Hotit në Shkodër, ku kanë ngelur në vend numëro pasi askush nuk i lejon të shkojnë në banesat e tyre në Tiranë.
Ata kanë shkuar pranë Komisariatit të Policisë Shkodër por nuk janë pajisur me autorizim. 20 shtetasit shqiptarë kanë kaluar ne doganën e Hanit të Hotit pasi janë njoftuar se mbyllet kufiri.
Prej 15 ditësh ata kanë qenë në Malin e Zi ku punojnë si punonjës krahu. Ata i bëjnë apel shtetit që t’i lejojë të shkojnë në banesat e tyre në Tiranë.
“Ne kemi qenë në punë në Mal të Zi. Kemi shkuar në Doganën e Murriqanit, nuk na kanë pranuar. Në Han të Hotit na kanë thënë ecni në këmbë. Kemi ecur 4 orë. Duam të ikim tek shtëpia në Tiranë. Tek policia nuk na kanë dhënë asnjë zgjidhje”, shprehet njëri prej tyre.
