Presidentja e Komisionit Evropian, Ursula Von Der Leyen ka bërë me dije se Bashkimi Evropian do të vendosë kufizime të përkohshme për udhëtimet jo-thelbësore. Ndalimi i udhëtimit drejt shteteve të BE-së do të zgjasë për 30 ditë për shkak të pandemisë së COVID-19.
Plani i masave pritet të bëhet publik nesër, ndërkohë që Von Der Leyen ka njoftuar më parë shtatë shtetet më të fuqishme ekonomikisht në BE.
Nuk bëhet me dije nëse pjesë e këtyre kufizimeve do të bëhen edhe shtetet jo-anëtare të BE-së, por që u lejohet lëvizja e lirë në zonën Shengen, siç është rasti i Shqipërisë. Pritet të mësohet nesër nëse vendi ynë do të jetë në listën e shteteve qytetarët e të cilëve u ndalohet udhëtimi drejt 27 shteteve anëtare të BE-së.
Gjithsesi, Tirana ka bllokuar më herët linjat ajore drejt Italisë, Greqisë dhe Austrisë, për të parandaluar përhapjen e mëtjeshme të koronavirusit.
