Drejtori i Përgjithshëm i Organizatës Botërore të Shëndetësisë (OBSH) tha sot se ka një mesazh të thjeshtë dhe të vetëm për shtetet për mënyrën se si të luftojnë koronavirusin: të realizohen sa më shumë teste të personave të dyshuar.
Tedros Adhanom Ghebreyesus theksoi se karantina është një mundësi e mirë për izolimin e virusit, por kjo nuk i jep zgjidhje situatës. Sipas tij, koronavirusi nuk mund të zhduket nëse nuk dihet se kush është infektuar, pasi në këtë mënyrë do të qarkullojë vazhdimisht.
Ndaj ai kërkon nga shtetet që të realizojnë sa më shumë teste të qytetarëve.
“Nuk mund të luftosh zjarrin me sytë e lidhur”, tha Ghebreyesus.
Kreu i OBSH-së pranoi se gjatë javës së kaluar pati një rritje shumë të madhe të të infektuarve me koronavirus në të gjithë botën.
