Qeveria e Kosovës është drejt shpërbërjes. Kreu i LDK-së, Isa Mustafa ka bërë me dije se do të kërkojë në Parlament mocion mosbesimi ndaj Qeverisë së Albin Kurtit. Kryeministri Kurti shkarkoi sot nga detyra e ministrit të Brendshëm, Agim Veliu, i cili është nga radhët e LDK-së.
Arsyeja e shkarkimit, tha sot Kurti, ishte se Veliu ka krijuar panik mbi deklaratat e tij për përhapjen e koronavirusit në Kosovë dhe ka rënë ndesh me deklaratat e kryeministrit mbi nevojën për shpalljen ose jo të gjendjes së jashtëzakonshme.
Kryetari i LDK-së, Isa Mustafa, ka thënë se partneri i koalicionit, VV-ja, ka shkelur në disa pika marrëveshjen për bashkëqeverisje. Ka folur edhe për mospajtimet rreth taksës ndaj mallrave të Serbisë, për çka LDK-ja insiston që të hiqet plotësisht dhe pa kushte, siç po kërkon SHBA-ja.
LDK-ja dhe Vetëvendosje kanë vetëm një muaj e gjysmë që janë në koalicion./fjala.al
