Shqipëria ka marrë garancinë e Turqisë për ndihma ushqimore dhe spitalore në rast të një krize të thellë globale për shkak të koronavirusit. Në një lidhje me emisionin “Opinion”, Rama tha se është në komunikim të vazhdueshëm me presidentin turk, Rexhep Taip Erdogan, të cilit i ka dërguar një listë me kërkesa.
“Edhe nëse ndodh që të ‘përmbyset’ bota, atë pjesën kritike, atë gjënë që duhet ta kemi të garantuar për një plan C, duhet që ta kemi të garantuar dhe e kemi të garantuar me Turqinë”, tha kryeministri.
Rama theksoi se është në kominikim me Turqinë që prej dy javësh që vendi të mos gjendet i papërgatitur.
Ndërkohë, sa i përket ndihmave të mundshme nga Kina, e cila u përball e para me koronavirusin, Rama tha se Ministria e Shëndetësisë e Shqipërisë i është drejtuar autoriteteve kineze, “por duhet patur parasysh se Kinës sot i kërkon ndihmë i gjithë planeti”.
