“The Sun”/Pas deklaratës së kryeministrit britanik Boris Xhonson, se të gjitha pabet dhe baret do të mbyllen për të parandaluar përhapjen e koronavirusit, britanikët u derdhën mbrëmjen e djeshme në të gjitha pabet dhe baret e vendit, duke mos respektuar kështu thirrjen e bërë nga autoritetet.
Kryeministri bëri një njoftim të jashtëzakonshëm, kur tha se do të mbyllen të gjitha baret dhe restorantet, duke nxitur tek mijëra qytetarë të kapluar nga paniku të derdheshin rrugëve të qytetit për të blerë alkool.
Kinematë, qendrat e argëtimit dhe kafenetë, do të mbyllen në të gjithë Britaninë, në një përpjekje të dëshpëruar për të shpëtuar jetën e britanikëve, ndërsa numri i të vdekurve në Britaninë e Madhe ka shkuar në 177. Restorantet do të vazhdojnë të jenë të mbyllura, ndërsa supermarketet do të mbeten të hapura.
Gjatë konferencës së tij të përditshme për shtyp, kryeministri Boris Xhonson deklaroi:”Pak nga pak, ditë pas dite, sjellja, vetëpërmbajtja dhe sakrifica juaj, do ta vendosë vendin në një pozitë më të mirë dhe më të fortë, nga ku do të jemi në gjendje që të mbrojmë mijëra jetë, njerëz të të gjitha moshave, njerëz që nuk meritojnë të vdesin tani”.
“Ne do t’a mposhtim këtë sëmundje me një përpjekje të madhe kombëtare, për të ngadalësuar përhapjen duke zvogëluar kontaktin social. Këto janë vende ku njerëzit mblidhen, por tani për tani ne duhet t’i mbajmë njerëzit larg njëri-tjetrit”- u shpreh Xhonson për britanikët.
Një ditë përpara se këto masat të hyjnë në fuqi, britanikët u derdhën për herë të fundit nëpër pabe për të rrëkëllyer pijet e tyre të preferuara, përpara pabet dhe baret të mbyllen. Njoftimi për mbylljen e pabeve dhe bareve, bëri që raftet e supermarketeve me birra dhe verë të zbrazeshin shumë shpejt.
Qeveria britanike ka shpallur gjendjen e jashtëzakonshme, çka i jep asaj të drejtën të bllokojë çdo veprimtari të organizuar apo “tubim” – duke filluar nga grumbullimet në pabe, baret dhe restorante. Kryeministri britanik, sqaroi se kjo situatë do të rishikohej muaj pas muaji./S.T/
