Drejtori i përgjithshëm i Burgjeve Agim Ismaili u shpreh se nisur nga kushtet ku ndodhet vendi për shkak të koronavirusit është ngritur një grup pune për të parë mundësinë që një kategori e caktuar e të burgosurve të lejohet që të dalin me leje të posaçme.
Në një lidhje me Skype në edicionin qendror të lajmeve në Report Tv , Ismaili theksoi se nuk është ende e definuar, por është në proces.
“Siguria është e garantuar në burgje. Kemi marrë masa shtesë të përforcuara. Sa lidhet me propozimin që dëgjova nga mediat, jam në dijeni që ka një proces për të shikuar mundësinë e një leje të posaçme për të burgosur të një kategorie të caktuar, nuk është ende e definuar, por është në proces. Po punojmë, por ende nuk ka vendimmarrje” tha ai.
Sot kreu i Avokatisë Penale, Saimir Vishaj deklaroi se në këtë periudhë duhet të aplikohet një formë e amnistie për të burgosurit që u kanë mbetur 2-3 vite burg.
