Mjeku i njohur infeksionist Arjan Harxhi ka treguar nëse koronavirusi do të zhduket nga ngrohja e motit. Sipas tij, asgjë nuk është e garantuar dhe Shqipëria duhet të përgatitet për të gjitha skenarët.
Megjithatë, sipas Harxhit, mund të merret si shembull virusi i gripit sezonal por të gjitha janë hamendësime dhe duhet të përgatitemi për të gjithë skenarët.
“Paralelja bëhet me virusin e gripit që është sezonal, dimë dhe modelin e SARS COV 1. Edhe pse ai mbeti një shpërthim epidemik i kufizuar, mbetet pikëpyetje se ku u zhduk. Ne i bëjmë këto lloj paralelesh por të gjitha janë hamendësime. Duhet të përgatitemi për të gjitha llojet e skenarëve. Problemi është të mos kapitullojë sistemi, qoftë shëndetësor qoftë ai në përgjithësi. këtu do hyjnë në lojë pastaj ekspertë të tjerë”, tha Harxhi për News 24.
Po kështu dhe Harxhi deklaroi se rastet më të buta të pneumonive mund të kalojnë në shtëpi.
“Në spital shtrohen ata që kanë nevojë. Ai 20% i pacientëve që kanë pneumoni dhe që kanë nevojë për mjekim suportiv që është oksigjeno terapia. Rastet e tjera mund ta kalojnë në shtëpi. Rastet e lehta, të buta, mund të kalohen në shtëpi. Nuk kanë nevojë për terapi në spital”, tha Harxhi.
Mesazhit të një nëne për djalin e saj që thoshte se ishte me temperaturë dhe kishte rezultuar pozitiv për koronavirusin por kishin kaluar dy javë, mjeku Harxhi iu përgjigj se “pas dyjavësh e ka kaluar periudhën e rrezikshme që mund të bëjë pneumoni të rënda”.
