Punonjëset e një fasonerie në Shqipëri dyshohet se janë prekur nga koronavirusi. Denoncimi bëhet nga Organizata Politike, e cila bën me dije se rasti i parë u shfaq më 20 mars, por drejtuesit e fasonerisë nuk pranuan të mbyllnin aktivitetin. Vetëm dy ditë më pas, kur 10 gra nuk u shfaqën në punë, fasoneria mori vendimin për t’u mbyllur me dy javë.
Pak ditë më parë u denoncua edhe një rast infektimi në një call center, por autoritetet përgjegjëse nuk kanë reaguar për të konfirmuar ose mohuar rastin.
Reagimi i Organizatës Politike për fasonerinë
Është konfirmuar rasti i parë i një punëtoreje 38-vjeçare të infektuar me virusin Covid-19 në fasonerinë ProDyn. Siç na bëjnë të ditur punëtorë të kësaj fabrike, rasti është evidentuar që tre ditë para, më 20 mars, por fabrika ka vazhduar punën normalisht me gjithë shqetësimin e shprehur nga punëtorët për përhapje të infeksionit. Vetëm tre ditë më pas, pasi 10 punëtorë të tjerë shfaqën simptomat e virusit dhe nuk u paraqitën në punë, pronarët vendosën të pezullojnë punën për dy javë.
Organizata Politike denoncon papërgjegjshmërinë kriminale që po tregon qeveria e Edi Ramës ndaj punëtorëve dhe qytetarëve të këtij vendi, duke lejuar vazhdimin e punës nëpër fabrika ku punojnë së bashku me qindra punëtorë.
Mbyllni fasoneritë!
Jetët e punëtorëve vlejnë më shumë se fitimet e oligarkëve!
