Kryeministri Edi Rama i ka kërkuar ministrit të Brendshëm Sandër Lleshajt që policia të kthejë në shtëpi çdo të moshuar që shihet në rrugë, pasi ata janë edhe kategoria më e rrezikuar nga koronavirusi.
Duke folur me secilin ministër për përballimin e situatës ndaj koronavirusit, Rama ka adresuar problematikat te kabineti qeveritar duke nisur që nga monitorimi i situatës nga policia dhe ushtria e deri tek ndihma që do t’u jepet familjeve në nevojë dhe biznesit të vogël.
Kryeministri Rama i kërkoi ministrit të Brendshëm që të zgjidhë problemin me të moshuarit që dalin në rrugë, gjë të cilën sipas Ramës ai e kishte hasur shpesh ditën e sotme gjatë një inspektimi në terren.
“Sot isha në terren. Pashë që tregjet ishin në rregull. Po kemi një problem me pensionistët. Pensionistët duhen kthyer në shtëpi. Policia duhet t’i kthejë në shtëpi. Duhen kthyer nga rruga. Patrulla e policisë që mbikëqyrin terrenin duhet të kthejnë të moshuarit në shtëpi. Nuk ka më “jo më fal, jo po se ja po shkoj deri këtu..”, theksoi Rama duke treguar justifikimet me të cilat u has ditën e sotme në takimet e tij me të moshuar.
Kryeministri gjithashtu kërkoi nga ministrat që pensioni të moshuarve t’u dërgohet në shtëpi, pasi nëse dalin ta marrin vetë, atëherë sipas Ramës hedhin në ‘erë’ të gjithë skemën në përballimin ndaj koronavirusit.
