Shefi i sektorit për sëmundjet kronike dhe politikat shëndetësore në ISHP, Alban Ylli foli në studion e ‘ABC Neës’ në lidhje me shtimin e rasteve të prekura me Covid-19 dhe u shpreh se nuk është arritur ende kulmi.
Sipas epidemologut piku pritet të jetë në maj, dhe nëse nuk do të ishin marrë masa do të ishte në Prill.
I pyetur se kur mund të dalin qytetarët nga shtëpia, Z.Ylli solli në vëmendje modelet e ndjekura nga vendet e tjera të prekura.
“Ekzistojnë modele edhe për këtë, por në fakt nuk është kaq e thjeshtë. Ekziston modeli i propozuar nga disa anglezë, nuk e di nëse qeveria angleze po e ndjek atë. Mund të futemi më atë modelin e karantinës, pra e frenojmë e lëmë pastaj ti japë pak frymë ekonomisë. Është një model që nuk më pëlqen shumë ta diskutoj në publik. Në Kinë ata kur kanë ulur vlerën e R-së me masat e para, ata kanë marrë masa të tjera dhe kanë krijuar spitalet fushore dhe kanë shmangur edhe qarkullimin në familje. Ata i kanë marrë të gjitha rastet e dyshuara dhe të smëurë, i kanë çuar në spitalet fushorë dhe e kanë çuar vlerën e R-së 1.2 apo 1.1”, deklaroi epidemologu.
