Mjeku Infeksionist Pëllumb Pipero ka shpjeguar situatën aktuale që është krijuar nga koronavirusi në Shqipëri.
“Në eksperiencën time 38 vjeçare nuk kam parë kurrë një virus si ky”, deklaroi Pipero.
Ai tha se në javën e parë të prillit do të merren përgjigjet e para se sa të efektshme kanë rezultuar masat e ndërmarra nga qeveria dhe sa janë zbatuar ato nga qytetarët.
Sa i përket lajmit të mediave italiane se koronavirusi mund të jetë shfaqur në fillim të janarit në Lombardi, Pipero e lidhi këtë me agresivitetin e virusit AH1N1 (gripi i derrit) në këtë sezon.
“Është shumë vështirë të japim mendime të sakta. Kemi pasur qarkullimin i gripit stinor, AH1N1 ka qenë më agresiv këtë vit, nëse studimi është bërë nga shkencëtarë të epidemiologjisë nuk kam çfarë të komentoj. Të dhëna të sakta për vendin tonë nuk kemi. Unë e lidh me AH1N1”, tha Pipero. Ai dha një këshillë për prindërit që kanë dilemë për të vaksinuar fëmijët e tyre.
“Do ti rekomandoja që ti bëhej vaksina, nuk do të këshilloja të ndërpritej skema e vaksinimit”, tha mjeku.
Sa i përket rritjes masive të rasteve të infektuara në Itali dhe në Spanjë, Pipero e lidhi me tre faktorë.
“Në qoftë se unë sjell në vëmendjen e përbashkët me atë që ka ndodhur në Itali dhe Spanjë unë e lidh me qarkullimin e shumtë në metro dhe me një shkujdesje të madhe nga qytetarët dhe me qeveritë që nuk kanë marrë masa në kohë”, tha mjeku.
