Përfaqësuesi i Lartë i Bashkimit Evropian Josep Borrell ka zhvilluar një bisedë me kryeministrin Edi Rama lidhur me vendimin për hapjen e negociatave dhe pandeminë botërore të koronavirusit.
Përmes një njoftimi të bërë publik nga vetë zyra e Bashkimit Evropian theksohet se Borrell është shprehur i kënaqur me vendimin e Këshillit për të hapur negociatat e pranimit me Shqipërinë dhe Maqedoninë e Veriut.
“Përfaqësuesi i Lartë theksoi se ky ishte një lajm i mirë për vendet, Ballkanin Perëndimor dhe Bashkimin Evropian”, thuhet në njoftim.
Më pas, përfaqësuesi i Lartë i BE-së dhe kreu i qeverisë shqiptare kanë diskutuar për bashkëpunimin e vazhdueshëm ndërkombëtar për të luftuar përhapjen e pandemisë së koronavirusit dhe rëndësinë e trajtimit të nevojave të menjëhershme për emergjencën.
“Ata u pajtuan se është i nevojshëm një veprim i fortë dhe i koordinuar për të adresuar ndikimin e kësaj pandemie në shoqëri dhe ekonomi. Josep Borrell nënvizoi se Bashkimi Evropian po punonte intensivisht me Ballkanin Perëndimor, dhe se bashkëpunimi dhe solidariteti janë thelbësorë”.
Zyrtari i lartë i BE iu referua mbështetjes specifike që Komisioni i dha Shqipërisë – mbi 50 milion € – për mbështetje të menjëhershme në sektorin e shëndetësisë dhe rimëkëmbjen socio-ekonomike të vendit.
Përfaqësuesi i Lartë i BE arriti në përfundimin se Bashkimi Evropian do të vazhdojë të qëndrojë pranë Shqipërisë.
