Pallati i Festivaleve duhet të ishte duke u përgatitur për të mirëpritur emrat më të njohur në industrinë e kinematografisë në tapetin e kuq. Por, vendi ku zhvillohet Festivali i Filmit në Kanë po hap dyert e tij për të pastrehët që nuk kanë ku të shkojnë gjatë bllokimit të lëvizjeve nga koronavirusi.
Festivali vjetor i filmit në qytetin e rivierës franceze do të zhvillohej nga 12-23 maji por organizatorët e shtynë ngjarjen deri në fund të qershorit. Pallati hapi dyert e tij të premten (20 Mars) për të varfërit.
“Strehojmë nga 50 deri 70 njerëz këtu çdo natë. Fillimisht, kishim planifikuar të strehonim 50 persona, por gjatë fundjavës, ka pasur më shumë kërkesa. Dhe kështu duke respektuar distancimin social, ishim në gjendje të vendosnim 70 deri në 80 shtretër. “, tha Dominique Aude-Lasset, një zyrtare në Bashkinë e Kanës.
Ditë më parë, Presidenti Emmanuel Macron u tha 67 milion banorëve të Francës të qëndronin në shtëpi për të mbrojtur veten nga pandemia, dhe të ngadalësonin përhapjen e saj. Ky është një problem i madh për 12,000 të pastrehët në vend që jetojnë në rrugë.
Ekziston shqetësimi se koronavirusi mund të ketë një ndikim të madh tek të pastrehët të cilët shpesh jetojnë pa kushtet e duhura sanitare dhe ndonjëherë vuajnë nga sëmundje kronike. Shumë njerëz mbështeten në lëmosha nga njerëzit që tani janë të bllokuar në ambiente të mbyllura.
Në hyrje të godinës, një punëtor me maskë për fytyrën mat temperaturën e çdo personi të pastrehë, sa herë që ata hyjnë në ndërtesë. Brenda, ka një dhomë ngrënieje, dush dhe hapësirë të përbashkët me televizorë dhe lojëra. Në një dhomë tjetër me tavane të ulta, krevatet e marinarit vendosen në tre linja të gjata.
Ekzistojnë gjithashtu katër kolibe për të mikpritur miqtë më të mirë të njeriut.
“Ne e dimë se ata janë miqë të çmuar për të gjithë këta njerëz që jetojnë në rrugë,” tha Aude-Lasset./voa
