Gjatë komunikimit të tij të drejtpërdrejtë, kryeministri Edi Rama ka folur edhe për shqiptarët që gjenden jashtë vendit dhe e kanë të domosdoshme të rikthehen në atdhe pavarësisht situatës së vështirë të krijuar nga koronavirusi.
Kreu i qeverisë ka theksuar se qeveria dhe Ministria e Jashtme e ka bërë gati listën e personave që do të rikthehen në Shqipëri përmes ‘Lasgushit’ të ‘Air Albania’.
Sipas tij, kjo është një listë e mbyllur dhe jo një listë e hapur, gjë që do të thotë se jo çdokush që dëshiron të kthehet në atdhe mund t’i realizohet një gjë e tillë.
Rama shpjegoi se në Shqipëri do të kthehen të gjithë ata persona që gjenden në kushte të vështira dhe që janë ndodhur jashtë vendit përgjatë kohëve të fundit, kur koronavirusi i kapi në befasi.
Për këtë arsye sipas Ramës, lista e mbyllur është bërë gati dhe do të bëhet e mundur rikthimi i tyre.
“Nuk mund të ketë listë të hapur. Ne kemi këtu një listë të mbyllur për të kthyer njerëzit nga jashtë. Do të kthejmë nga jashtë ata që janë në vështirësi dhe që kanë mbetur këto kohët e fundit jashtë vendit për shkak të koronavirusit. Nuk mund të kthejmë ata që jetojnë jashtë dhe që thonë ‘hajt se po kthehem në Shqipëri tani”, theksoi Rama.
