30 mjekët shqiptarë që u nisën drejt Italisë për të ndihmuar kolegët e tyre në përballjen me koronavirusin, duket se nuk janë pajisur me të gjithë dokumentacionin përkatës në Tiranë. Siç bën me dije ‘la Repubblica’, mjekët shqiptarë u janë nënshtruar një provimi për të përcaktuar njohuritë pasi nuk kishin një dokument që provonte kompetencat e tyre.
Kjo konfirmohet edhe nga Gianmarco Trivelli, drejtori i Përgjithshëm i i Spitalit Civil të Breshias: “Ne jemi mirënjohës për ardhjen e mjekëve dhe infermierëve që kanë mbërritur nga Shqipëria, por për fat të keq mbetet një problem themelor: prania e personelit të specializuar për kujdes intensiv. Ata u prezantuan pa një dokument që vërteton aftësitë e tyre dhe ata do të bëjnë një provim brenda ditës për të kuptuar se ku t’i drejtojnë ata.”
Pavarësisht tragjedisë me të cilën po përballen, autoritetet italiane nuk kanë pranuar të anashkalojnë veprimet administrative pasi puna lidhet drejtpërdrejtë me jetën e qytetarëve.
Gjithsesi, përtej këtij problemi burokratik, mbërritja e mjekëve shqiptarë është vlerësuar nga e gjithë shoqëria dhe politika italiane. Ndonëse një numër i vogël, zyrtarët italianë e kanë konsideruar veprimin e Tiranës si një mesazh të qartë për shtetet e Bashkimit Evropianë.
Veprimi i shqiptarëve është përshëndetur edhe nga personalitete ndërkombëtare si aktorja Sharon Stone.
