Presidenti i Kosovës, Hashim Thaçi, ka folur pas takimit me kryeministrin në detyrë, Albin Kurtin, kryetarin e LDK-së, Isa Mustafa dhe kryetarin e PDK-së, Kadri Veselin
Në një konferencë për mediat, Thaçi u shpreh se ai do të veprojë vetëm në përputhje me Kushtetutën.
“Pavarësisht vështirësive që kemi nga coronavirusi, jeta institucionale në Kosovë vazhdon dhe natyrisht funksionimi i demokracisë. Sot kam takuar kryetarin e LVV-së, Albin Kurtin, kryetarin e LDK-së, Isa Mustafa dhe kryetarin e PDK-së, Kadri Veselin, pas mocionit të mosbesimit ndaj Qeverisë së Kosovës jam i detyruar duke respektuar Kushtetutën dhe ligjet e vendit, për të filluar konsultat me liderët e partive në vend për hapat e mëtutjeshëm të funksionimit e institucioneve të Kosovës apo themelimin e institucioneve reja, Qeverisë së re“, u shpreh Thaçi.
Presidenti i Kosovës shtoi gjithashtu se nesër do të vazhdojë takimet me liderët e partive tjera politike.
“Takimet po mbahen në mënyrë që të krijojë një bazë të opinioneve apo të formësojë veprimet e mëtutjeshme që duhet t’i ndërmarrë si president pas shkarkimit të qeverisë”, tha Thaçi para mediave.
