Ish-kapiteni i kombëtares, Lorik Cana ka rihapur një temë të nxehtë që prej kohësh prek shqiptarët.
Cana, i cili ndodhet në Romë ku qëndron edhe i karantinuar për shkak të situatës së vështirë të krijuar nga koronavirusi ka folur mbi atë që i shqetësuar më së shumti tifozët kuqezinj.
Në një intervistë për ‘Fan Zone’ në Supersport, Cana ka rihapur temën e nxehtë mbi kombëtaren shqiptare, ku sipas tij, duhet të jetë vetëm një e tillë edhe pse Kosova është shtet më vete.
“Unë mendoj gjatë dhe shoh larg, ndaj them me bindje që nuk ka pse të kemi dy kombëtare, kur jemi një komb. Jo vetëm unë, por shumica e shqiptarëve mendojnë se duhet vetëm një kombëtare dhe ajo kuqezi e ka bërë më së miri detyrën për të përfaqësuar kombin shqiptar”, ka deklaruar Cana.
Një temë e nxehtë kjo për tifozët kuqezinj të cilët në këtë kohë po shohin se si do të ndikojë koronavirusi në mbarëvajtjen e futbollit shqiptar por edhe vetë kombëtares.
Aq më tepër kur FSHF dhe qeveria kanë hyrë në një kurs përplasjeje me njëra-tjetrën për ndihmën që duhet të marrë futbolli shqiptar në këtë kohë të vështirë.
