Një shtetas amerikan është gjetur i vdekur në apartamentin e tij në Sarandë. 70-vjeçari Robert Hood, nga Alaska jetonte prej tri vitesh, i vetëm në një apartament me qira, në lagjen nr.1 në qytetit bregdetar.
70-vjeçari kishte tre ditë që nuk u përgjigjej telefonatave të njërit prej miqve të tij. I shqetësuar miku i tij ka telefonuar Policinë e Sarandës.
Kjo e fundit së bashku me shërbimin zjarrfikës dhe mjekët kanë hyrë në apartament, ku e kanë gjetur të pajetë në shtratin e tij 70 –vjeçarin, raporton BW.
Trupi i tij është nisur drejt Tiranës për ekspertizë mjeko–ligjore për të përcaktuar shkakun e vdekjes, dhe nëse lidhet me koronavirusin apo shkaqe të tjera.
Sipas policisë, nga këqyrja e trupit të viktimës, nuk ka pasur shenja dhune. Ndërsa pritet ekspertiza për të bërë të ditur shkakun e vërtetë të vdekjes së 70-vjeçarit amerikan.
