Në Shtetet e Bashkuara të Amerikës pronarët e dyqaneve të kanabisit janë duke bërë thirrje që të përfshihen në paketën e ndihmave të qeverisë, në kuadër të luftës kundër koronavirusit. Edhe pse Qeveria federale ka miratuar një paketë prej 350 miliardë dollarë për bizneset e vogla, shitësit e kanabisit nuk mund të përfitojnë prej saj.
Shitja dhe konsumimi i kanabisit është i lejuar në 34 shtete të SHBA-së, por ende nuk është pranuar në nivel federal. Për këtë arsye bankat kanë frikë të japin kredi për bizneset e vogla të kësaj industrie pasi rrezikojnë të thyejnë ligjin federal.
Por të gjendur në vështirësi nga izolimi, pronarët e dyqaneve të kanabisit thonë se duan ndihmë të menjëhershme pasi rrezikojnë falimentimin. Kërkesa për kanabis vijon të jetë e lartë në kushtet e karantinës, por shumë prej bizneseve nuk kanë përfituar lincencën për transportin.
Industria e kanabisit është një prej industrive me rritjen më të shpejtë në SHBA, me 243 mijë vende pune dhe 13 miliardë dollarë shitje të regjistruara vitin e kaluar.
