Gazetari investigativ Artan Hoxha ka rrëfyer se si i shumkërkuari nga policia Orges Bilbili, i cili u arrestua pak ditë më parë, u shndërrua në vrasës me pagesë.
Artan Hoxha ka treguar se ai bashkë me grupin e tij kishin si synim të merrnin nën kontroll qytetin e Lushnjës.
“Unë e kam ndjekur këtë grup nga vitit 2010, kur këta kanë qen 20 vjeçar dhe është rasti tipik se si funksionet tona të ligjt nuk veprojnë. Po të shohësh procedimin 450 në dosjen e vitit 2010, ka qenë një grup me 7 të rinj, mes të cilëve edhe Laert Haxhiu e Anterio Kaloshi. Janë marrë me grabitje të vogla dhe janë arrestuar disa herë nga policia. Ne u kushtuam vëmendje atyre në momentin që ra avioni i Girogio Riformatos në Maj të vitit 2014, ku të përfshirë në trafikun ndërkombëtar të kanabisit rezultoi edhe Orges Bilbili dhe është dënuar me 7 vite e 4 muaj burg. 4 vjet më pas në Lushnjë kemi 4 të vrarë, 30 familje të larguara me status në vendet e BE ku kanë paraqitur dokumenta që jeta e tyre rrezikohej”, tha Hoxha për emisionin “Opinion”.
Ai shpjegoi më tej se Bilbili ka mbështetje në strukturat e policisë, pasi uniformat blu kanë dështuar në 14 operacione për kapjen e tij.
“14 operacione të forcave speciale gjatë këtyre viteve kanë dështuar. U kthyen në vrasës me pagesë dhe rezulton se kanë bërë vrasje tipike mafioze edhe në Fier, Durrës edhe në Vlorë. Një grup që po tentonte të merrte në kontroll qytetin e Lushnjës. Janë vrasje me viktima krejtësisht të pafajshme. Ishin vrasje tipike që tentonin jo thjesht të ekzekutonin viktima , por të ngjallnin terror. Këta nuk largoheshin nga territori i Shqipërisë, qëndronin këtu”, deklaroi gazetari Hoxha.
Orges Bilbili, një nga autorët e masakrës së Lushnjës, u arrestua nga një efektiv policie ditën e premte, ku mbeti edhe i plagosur gjatë shkëmbimit të zjarrit. Bilbili u pikas duke ecur në zonën e Xhamllikut, dhe kundërshtoi urdhrin e efektivit për treguar kartën e identitetit dhe nxori nga çanta armën e zjarrit. Polici i është vendosur pas dhe e ka paralajmëruar që të ndalojë, ndërsa Bilbili i ka thënë se do e qëllojë nëse nuk largohet.
Efektivi ka qëlluar një herë në ajër, më pas e ka plagosur në këmbë. Nga përplasja me armë mbeti e plagosur aksidentalisht edhe një grua. Gruaja dhe Bilbili janë jashtë rrezikut për jetën, ndërsa ky i fundit ka përfunduar në qeli.
