Kryeministri Edi Rama ka shpjeguar sërish ditën e sotme paketën e dytë ekonomike në përballimin e situatës nga koronavirusi.
Sipas kryeministrit Rama do të ndihmohen 176 mijë qytetarë, të cilët do marrin 400 mijë lekë secili.
Rama theksoi se nga paga e luftës do të përfitojnë të gjitha ato familje që përfshihen në paketën e dytë ekonomike dhe paratë sipas tij, do të shkojnë direkt tek qytetari.
Sipas kreut të qeverisë, e gjithë kjo shumë do të shkojë te qytetari do apo nuk do shefi apo pronari i kompanisë.
Sipas kryeministrit, procedura kërkon vetëm një verifikim në email.
“E kam të pamundur t’ua shpjegoj të gjithëve të njëjtën gjë pafundësisht. Ne duam që kjo pagë, 400 mijë lekë të vijë drejtpërdrejt tek ju, jo nëpërmjet kompanisë ku punon. Punonjësit janë përzgjedhur bazuar nga dokumentet që janë paraqitur nga kompanitë deri në datën 10. Që do të thotë se të gjithë ata që janë larguar nga puna për shkak të covid-19, marrin pagën. Pra ne disponojmë emrin tuaj dhe duhet vetëm të konfirmoni. Një konfirmim shumë i thjeshtë pa asnjë procedurë….është e detyrueshme të bëhet një verifikim. Ndërsa për bizneset e vogla është më e gjatë procedura. Askush nuk mbetet pa marrë pagën, por thjesht procedura e verifikimit është pak më e gjatë. Thjesht me një klik, përmjet emailit, do tregoni, jam unë dhe kaq. Nuk duam që pronari t’ua mbaje lekët e t’ua japë një pjesë,” u shpreh Rama.
