Deputetja Rudina Hajdari ka zhvilluar ditën e sotme një bisedë me ambasadoren e Shteteve të Bashkuara të Amerikës, Yuri Kim.
Përmes një postimi në “Facebook”, Hajdari shkruan se ka informuar ambasadoren për gjendjen e vështirë që ndodhen shumë familje shqiptare në kohën e pandemisë.
Më tej Hajdari shton se ka folur dhe për ndryshimet në Kodin Penal, për të cilat ajo është shprehur se është kundër.
“Gjeta rastin të falenderoja ambasadoren për kontributin e SHBA-së, me pajisje personale të mbrojtjes nga programi për Asistencë Humanitare i Komandës Europiane të Shteteve të Bashkuara në mbrojtjen e punonjësve të shëndetit në vijën e parë të luftës kundër COVID-19. ????”,-shkruan deputetja.
Postimi i plotë:
Kënaqësi të bashkëbisedoja nëpërmjet video-konferencës me Ambasadoren amerikane Znj. Yuri Kim, mbi situatën e tanishme në Shqipëri. E informova për gjendjen e vështirë në të cilën ndodhen shumë familje shqiptare, realitet të cilin e kam prekur këto ditë teksa jam munduar të ndihmoj sado pak këto familje në nevojë.
Gjithashtu shpreha shqetësimet e mia për gjendjen emergjente nga COVID-19, mbi ndryshimet e Kodit Penal, të cilat janë të panevojshme e sidomos përmenda faktin se këto ndryshime cënojnë Kushtetutën dhe Konventën Europiane për të Drejtat e Njeriut. Gjeta rastin të falenderoja ambasadoren për kontributin e SHBA-së, me pajisje personale të mbrojtjes nga programi për Asistencë Humanitare i Komandës Europiane të Shteteve të Bashkuara në mbrojtjen e punonjësve të shëndetit në vijën e parë të luftës kundër COVID-19./Fjala.al/
