Presidenti i Kosovës, Hashim Thaçi, i ka dërguar një tjetër letër kryeministrit në detyrë, Albin Kurtit.
Letra e katërt që Thaçi i ka dërguar Kurtit ka të bëjë me emrin që ky i fundit duhet t’ia dërgojë për kandidatin për kryeministër pas mocionit të mosbesimit.
Megjithatë Kurti duket se dëshiron ta çojë Kosovën drej zgjedhjeve të parakohshme më shumë se sa t’ja lërë postin një tjetri edhe pse brenda partisë së tij.
Në letrën e fundit që Thaçi i ka dërguar Kurtit i thotë se mosrefuzimi nga ana e tij nënkupton që ta dërgojë emrin e kandidatit/es për Kryeministër, të cilën nuk e ka bërë ende, duke marrë parasysh faktin që presidenti i ka dërguar tre kërkesa për këtë çështje.
Letra e Hashim Thaçit:
Në përputhje me nenin 95 të Kushtetutës dhe Aktgjykimin e Gjykatës Kushtetuese në rastin nr. K0103/14, presidenti Thaçi edhe një herë i ka kërkuar Kurtit që ta dërgojnë emrin e kandidatit/es për Kryeministër pa humbur kohë.
“Përkundër kërkesave të dërguara më 2 prill 2020 (Ref. 354), më 10 prill 2020 (Ref. 354/1) dhe më 15 prill 2020 (Ref. 370/1), edhe në shkresën tuaj të dërguar më 17 prill 2020 (Ref. 122/2020), ju nuk keni propozuar kandidatin/en për Kryeministër, por keni theksuar se nuk jeni duke refuzuar për të propozuar kandidatin për kryeministër. Më lejoni t’ua theksoj se mosrefuzimi nga ana juaj nënkupton që ta dërgoni emrin e kandidatit/es për Kryeministër. Por, ju nuk e keni bërë ende këtë, përkundër faktit që ua kam dërguar tri kërkesa për këtë qëllim”, ka shkruar në letrën e tij presidenti Thaçi./Fjala.al/
